Молитва святой великомученице Екатерине

О святая Екатерино, дево и мученице, истинная Христова невесто! 
Молим тя, яко велию благодать дарова ти Жених твой, Сладчайший Иисус, якоже посрамивши прелести мучителя, мудростию твоею пятьдесят ветий победила еси и, напоивши их небесным учением, к свету истинная веры наставила еси, тако испроси и нам оную Божию мудрость, да и мы, расторгнувше вся козни адскаго мучителя и презрев мира и плоти соблазны, достойны явимся Божественныя славы и к разширению святыя нашея православныя веры сосуды достойны соделаемся, и с тобою в небесной скинии Господа и Владыку нашего Иисуса Христа
восхвалим и прославим во вся веки. 
Аминь. 



Молитва 2-я

О святая великомученице Екатерино, избранный чистоты сосуде, столпе Православия, надежная предстательнице наша, явившая нам сама вину умоляти тя, подвижнице законная, святая на святей горе свято почивающая! Молим тя: приникши свыше вонми гласу моления нашего, призри на бедствие рабов твоих, просвети омрачение ума нашего, сотвори нас горняя мудрствовати, а не земная. Поспеши нам молитвами твоими побеждати плотская похотения, пристрастия к миру и козни злых духов, на нас злобно воюющих, да твоим предстательством во дни жития сего свободни явимся от враждебных их нападений и по исходе от воздушных их истязаний. О премудрая дево! Даруй нам вся, яже к пользе прошения, можеши бо многая испросити у возлюбленного Жениха, Христа Бога нашего. Вемы, яко много может молитва праведного, поспешествуемая благоутробием Милосердаго Бога, Ему же слава, честь и благодарение всегда, ныне и присно и во веки веков. 
Аминь.